Мотивациялық дәріс: «Тұлғалық даму және көшбасшылық: жетістік формуласы»

Спикер: Бакбергенова Диана Бакытбергеновна – PR & Media продюсері, artgala.kz платформасының негізін қалаушы.

Ұйымдастырушылар: Тұлға қалыптастыру департаменті, Қыздар көшбасшылығы мен кәсіпкерлік орталығы.

Дәрістің мақсаты:
Студенттердің тұлғалық дамуын қолдау, көшбасшылық қабілеттерін жетілдіру және табысқа жетудің тиімді жолдарын көрсету.

Дәріс БҰҰ-ның Тұрақты даму мақсаттарының IV – «Сапалы білім» бағытына сәйкес, білім алушылардың кәсіби және жеке дамуына үлес қосады.

Күні: 25 қыркүйек 2025 ж.
Уақыты: 15:00 – 16:00
Өтетін орны: №1 оқу ғимараты, 118-кабинет, Business Hub

Барлық студенттерді қатысуға шақырамыз!

Саяси сауат – өркениетті қоғам кепілі

Университетімізде Жастар саясаты орталығының ұйымдастыруымен Мемлекет басшысы Қасым-Жомарт Тоқаевтың 2025 жылғы 8 қыркүйектегі халыққа жолдауында айтылған парламенттік реформа аясында дөңгелек үстел өтті.

Шараның басты мақсаты – студенттердің саяси сауаттылығын арттыру, азаматтық белсенділігін дамыту және жастарды елдің қоғамдық-саяси өміріне белсене қатысуға ынталандыру.

Жиынға Алматы қаласы Алмалы аудандық аумақтық сайлау комиссиясы төрағасының орынбасары Гүлнар Ниязова және комиссия хатшысы Аяулы Камалбекова арнайы шақырылды. Олар жастарға сайлау жүйесі, референдум өткізу тәртібі және әрбір азаматтың демократиялық құқықтары туралы жан-жақты түсінік берді.

Дөңгелек үстелден кейін университеттің «Парасатты Нағыз Лидерлер Одағы» дебат клубының пікірсайысшылары Мемлекет басшысының бастамаларына байланысты қызықты әрі мазмұнды дебат өткізді. 

Студенттер парламенттік реформаның маңызы, демократиялық құндылықтарды нығайту және жастардың саяси процестерге қатысуының қажеттілігі жөнінде өз ой-пікірлерін ортаға салды.

Бұл шара жастардың құқықтық мәдениетін жетілдіруге, демократиялық құндылықтарды насихаттауға және азаматтық жауапкершілікті арттыруға ықпал етті.

Қаржылық сауаттылық: Мотивациялық кездесуге шақырамыз

QyzPU Тұлға қалыптастыру департаменті және Қыздар көшбасшылығы мен кәсіпкерлік орталығы 1 курс студенттеріне арналған мотивациялық кездесулерін бастайды. Алғашқы дәріс 18 қыркүйек күні сағат 16:00-де АКТ залында өтеді. Қонақ ретінде «FingWin» қаржылық қосымшасының негізін қалаушы Нұргүл Бексұлтанқызы шақырылды.

Дәрістің мақсаты – қатысушыларға қаржылық сауаттылықтың негізгі қағидаттарын түсіндіру, жеке қаржыны тиімді басқаруды үйрету, инвестициялық ойлау қабілетін дамыту және саналы шешім қабылдауға бағыт беру.

Бұл бастама БҰҰ-ның Тұрақты даму мақсаттарымен үндесіп, IV – Сапалы білім, V – Гендерлік теңдік, VIII – Лайықты жұмыс пен экономикалық өсу бағыттарын қолдайды. Қаржылық сауаттылықты дамыту жастардың, әсіресе қыздардың көшбасшылық әлеуетін арттырып, кәсіпкерлікке деген ынтасын күшейтеді және қоғамда тең мүмкіндіктерді қалыптастыруға ықпал етеді. Студенттерді кездесуге қатысуға шақырамыз.

«QYZPU FEST – 2025» өзін-өзі басқару ұйымдарының жәрмеңкесі өтті

16-17 қыркүйек күндері университетте дәстүрлі «QYZPU FEST – 2025» өзін-өзі басқару ұйымдарының жәрмеңкесі өтті. Бұл шара – жас педагогтерді жан-жақты қолдап, олардың шығармашылық, көшбасшылық және ұйымдастырушылық әлеуетін дамытуға бағытталған маңызды алаң.

Жәрмеңкенің басты мақсаты – университет студенттерін түрлі өзін-өзі басқару ұйымдарының қызметімен таныстыру, олардың қоғамдық өмірге белсенді араласуына жағдай жасау және жаңа мүшелерді тарту.

Шара аясында студенттік кеңестер мен ұйымдардың таныстырылымы өтті, мәдени және спорттық бағдарламалар ұсынылды, еріктілер қозғалысы мен жастар бастамаларының жобалары көрсетілді, студенттердің шығармашылық қойылымдары мен интерактивті ойындар ұйымдастырылды.

«QYZPU FEST – 2025» – студенттердің тұлғалық дамуына, университет өміріне белсенді араласуына және көшбасшылық қасиеттерін шыңдауына ықпал ететін дәстүрлі мереке.

Аталған шара болашақ мамандарды қоғамға бейімдеуде, олардың кәсіби-әлеуметтік дағдыларын қалыптастыруда ерекше маңызға ие.

Жастардың денсаулығы – білім мен жетістік кепілі

QyzPU Кәсіби білім беру колледжінде 1 курс студенттеріне арналған менталды және физикалық саулықты қолдау тақырыбында маңызды кездесу өтті.

Кездесудің  мақсаты – жастардың менталды және физикалық саулығын қолдау арқылы олардың оқу жетістіктері мен өмірлік белсенділігін арттыру.

Іс-шараға Менталды денсаулықты дамыту орталығының психологы Ақбота Нұрланқызы Төлеуғалиева қатысып, орталықтың негізгі қызмет бағыттары, студенттерге көрсетілетін психологиялық қолдау түрлері жөнінде баяндады. Ол менталды саулықтың оқу жетістігіне және әлеуметтік бейімделуге тигізетін оң әсері туралы айтты. 

Сонымен қатар Жалпы тәжірибелі дәрігер Айман Максетовна Тулегенова жастардың физикалық саулығын нығайту мәселесіне тоқталып, дұрыс тамақтанудың, салауатты өмір салтының артықшылықтары мен аурулардың алдын алу жолдары туралы құнды ақпарат ұсынды.

Жиын барысында студенттер мамандарға сұрақтар қойып, өз ой-пікірлерін ортаға салды.

Менталды саулық – табысты оқудың кепілі

Бүгін Әлеуметтік-гуманитарлық ғылымдар және өнер институтының 1 курс студенттері үшін менталды саулықты қолдауға арналған маңызды кездесу ұйымдастырылды.

Іс-шара барысында Менталды денсаулықты дамыту орталығының психологы Төлеуғалиева Ақбота Нұрланқызы орталықтың негізгі қызмет бағыттарын таныстырып, студенттерге көрсетілетін психологиялық қолдау түрлері мен олардың табысты оқуына және әлеуметтік бейімделуіне тигізетін ықпалын атап өтті.

Сондай-ақ орталықтың коуч-психологы Мусина Сара Смановна «Психолог көмегінің қаншалықты маңызды?» тақырыбында баяндама жасап, студенттердің өмірінде психологиялық қолдаудың маңызы мен рөлін түсіндірді.

Кездесу барысында студенттер мамандарға өздерін толғандырған сұрақтарын қойып, кәсіби кеңестер алды.

Бұл шара жас буынның университет өміріне бейімделуіне, менталды денсаулық мәдениетін қалыптастыруға және студенттердің өз әлеуетін толық жүзеге асыруына септігін тигізді.

Менталды саулықты қолдау: студенттермен кездесу өтті

Бүгін Педагогика және психология институтының 1 курс студенттеріне арналған менталды саулықты қолдау бағытындағы маңызды кездесу өтті.

Іс-шараның басты мақсаты – жастар арасында менталды және физикалық саулықты нығайту, олардың оқу жетістіктері мен өмірлік белсенділігін арттыруға ықпал ету.

Кездесу барысында Менталды денсаулықты дамыту орталығының психологы Төлеуғалиева Ақбота Нұрланқызы сөз сөйлеп, Орталықтың негізгі қызмет бағыттары, студенттерге көрсетілетін психологиялық қолдау түрлері, олардың оқу процесіндегі және әлеуметтік бейімделудегі маңызы туралы жан-жақты баяндады.

Сонымен қатар дәрігер-терапевт Асқарова Зағира Нұрлановна жастардың денсаулығын сақтаудың өзектілігі, дұрыс тамақтану мен салауатты өмір салтының артықшылықтары, сондай-ақ аурулардың алдын алу тетіктері жөнінде құнды мәліметтермен бөлісті.

Жиын барысында студенттер мамандарға өз сауалдарын қойып, пікір алмасты. Кездесу студенттердің психологиялық және физикалық саулықты сақтауға деген қызығушылығын арттырып, пайдалы ақпарат алмасу алаңына айналды.

Ішкі тыныштық – мықты тұлғаның негізі

Бүгін Филология институтында 1 курс студенттеріне арналған менталды саулықты қолдау бағытындағы маңызды кездесу өтті. Шараны Менталды денсаулықты дамыту орталығы ұйымдастырды.

Кездесу аясында орталықтың психотерапевті Каримова Раушан Бейдалиевна «Ішкі тыныштық – мықты тұлғаның негізі» тақырыбында ақпараттық-түсіндірмелік дәріс оқыды. Негізгі мақсат – студенттердің эмоционалдық тұрақтылығын нығайту, күйзеліс пен мазасыздықтың алдын алу, өзін-өзі тану және өзін-өзі реттеу дағдыларын қалыптастыру.

Іс-шара интерактивті форматта өтіп, студенттер өздерін толғандырған сұрақтарына жауап алды, тәжірибелік кеңестермен танысты. Психологиялық жаттығулар орындалып, қатысушылардың өзін-өзі түсіну қабілеттері дамыды.

Кездесу соңында менталды саулықтың табысты өмір сүрудің басты шарты екені атап өтілді. Ішкі тепе-теңдікке жету – әр адамның өз қолында.

«Үздік ЖОО» номинациясын жеңіп алды

8–11 шілде аралығында Абай облысында өткен «ASK CAMP» Республикалық форумы аясында QyzPU «Үздік ЖОО» номинациясын жеңіп алды. Бұл жеңіс — жастардың азаматтық сана-сезімін қалыптастыру мен патриоттық тәрбие беруге бағытталған «Jas Power» жобасы аясындағы маңызды жетістіктердің бірі.

Форумды Мәдениет және ақпарат министрлігі мен Абай облысы Жастар саясаты басқармасының қолдауымен Қазақстан Студенттер Альянсы ұйымдастырды. Ауқымды жоба ел жастарына шабыт беріп, көшбасшылық қасиеттерін дамытатын, достық пен ынтымақтастықтың алаңына айналды.

Форум барысында қатысушылар мотивациялық сессияларға, командалық ойындарға қатысып, тарихи Жидебай еліне саяхат жасап, танымдық экскурсиялар арқылы Абай мұрасымен жақын танысу мүмкіндігіне ие болды.

«Үздік ЖОО» номинациясы — бұл тек марапат қана емес, сондай-ақ үздіксіз еңбектің, білім беру сапасының және студенттік бастамаларды қолдаудың айқын дәлелі. Қазақстанның барлық өңіріндегі жоғары оқу орындары арасында үздік атану — зор мәртебе әрі үлкен жауапкершілік.

QyzPU — еліміздің ғана емес, әлемдік деңгейде танылуға ұмтылып келе жатқан бірегей білім ордасы. Бүгінгі жеңіс — сол биік мақсатқа бастар жолдағы маңызды қадам.

Осы еңбекті бағалап, жоғары баға берген Қазақстан Студенттер Альянсына зор алғысымызды білдіреміз!