Уақытты басқару өнері: студенттер тиімді жоспарлау дағдыларын меңгерді

Қазақ ұлттық қыздар педагогикалық университетінің №1 студенттер үйінде 2025 жылғы 9 қазан күні Менталды денсаулықты дамыту орталығының психологы Төлеуғалиева Ақбота Нұрланқызының жетекшілігімен студенттерге арналған «Уақытты басқару өнері: мақсатқа жетудің тиімді жолдары» атты семинар-тренинг өтті.

Шараның мақсаты – студенттерге уақытты тиімді басқару, мақсат қою және оған жүйелі түрде жету дағдыларын қалыптастыру болды.

Тренинг барысында қатысушылар тайм-менеджменттің негізгі қағидаларымен танысып, уақытты жоспарлаудың тиімді әдістерін үйренді. Психолог Ақбота Төлеуғалиева өмірлік басымдықтарды айқындау, мотивацияны сақтау және психологиялық кедергілерді еңсеру тәсілдері жөнінде кеңес берді.

Семинар интерактивті форматта өтіп, студенттер практикалық тапсырмалар орындап, өз күн тәртібін талдап, мақсат картасын құруды үйренді. Қатысушылар өз тәжірибелерімен бөлісіп, тиімді жоспарлау мен өзін-өзі дамыту бойынша пайдалы кеңестер алды.

Іс-шара соңында студенттер уақытты басқарудың жеке және кәсіби табысқа жетудегі маңызын түсініп, болашақ мақсаттарына жету үшін нақты қадамдар белгіледі.

Аталған бастама БҰҰ-ның Тұрақты даму мақсаттарының бірі – ТДМ 3: «Денсаулық және амандық» бағыты аясында жүзеге асуда.

«Бір толқында: байланыс пен сенім» – студенттердің менталды саулығын нығайтуға бағытталған тренинг өтті

2025 жылғы 8 қазан күні Қазақ ұлттық қыздар педагогикалық университетінің №2 студенттер үйінде Менталды денсаулықты дамыту орталығының психологтары Ақбота Төлеуғалиева мен Назерке Есенаманқызы «Бір толқында: байланыс пен сенім» атты тренинг өткізді.

Шараның басты мақсаты – студенттер арасында өзара сенім мен түсіністікке негізделген қарым-қатынас орнату, эмоционалды тепе-теңдікті сақтау және менталды тұрақтылықты дамыту болды.

Тренинг барысында қатысушылар түрлі психологиялық ойындар мен жаттығулар арқылы тиімді коммуникация құру, өз сезімдерін ашық білдіру және тыңдай білу мәдениетін үйренді. Сонымен қатар, мамандар студенттердің өзін-өзі тану және эмоцияларын басқару қабілеттерін жетілдіруге бағытталған практикалық тапсырмалар ұсынды.

Психологтардың пікірінше, мұндай тренингтер жастардың ішкі үйлесімін сақтап, әлеуметтік ортада сенімді әрекет етуіне сеп болады.

Аталған бастама БҰҰ-ның Тұрақты даму мақсаттарының бірі – ТДМ 3 «Денсаулық және амандық» бағыты аясында жүзеге асып келеді.

QyzPU студенттерінің психологиялық саулығын нығайтуға арналған мұндай кездесулер алдағы уақытта да жалғасын табады.

 

Students Party – 2025

2025 жылғы 7 қазан күні Қазақ ұлттық қыздар педагогикалық университетінде дәстүрлі «Students Party» – 1-курс студенттерін студенттік қатарға қабылдау салтанатты кеші өтті. Іс-шара Grand Ballroom залында ұйымдастырылды.

Биыл университет табалдырығын алғаш аттаған 2 243 студент үшін ұйымдастырылған бұл мереке ерекше шаттық пен қуанышқа толы болды. Шара екі ауысымда өтті: алғашқы ауысымға Филология, Әлеуметтік-гуманитарлық ғылымдар және өнер институттары мен Кәсіби білім беру колледжі, сондай-ақ әскери институттардың студенттері қатысты. Ал екінші ауысымға Педагогика және психология, Жаратылыстану, Физика, математика және цифрлық технологиялар институттарының студенттері жиналды.

Салтанатты кеш ҚР Мемлекеттік Әнұранымен ашылып, Қазақ ұлттық қыздар педагогикалық университетінің Басқарма төрағасы – Ректордың м.а. Суатай Сәбит Құрманжанұлы студенттерге жылы лебізін білдірді.

«80 жылдық тарихында талай дарынды қыздарды тәрбиелеп, биік белестерге жетелеген қасиетті қарашаңырақтың бір бөлігі болуы – зор мәртебе әрі үлкен жауапкершілік. Ұлы ойшыл Абай Құнанбайұлы айтқандай, “Толық адам” болудың басты шарты – ыстық қайрат, нұрлы ақыл, жылы жүрек. Осы үш қасиет Сіздер үшін бағыт-бағдар болуы тиіс», – деді Сәбит Құрманжанұлы өз құттықтауында.

Мерекенің ең әсерлі сәттерінің бірі – университеттің рухани құндылықтарын 1-курс студенттеріне табыстау рәсімі болды. Бұл дәстүр жаңа буын студенттерге университет рухын сезіндіру және студенттік бірлікті нығайту мақсатында өткізіледі.

Кеш бағдарламасы Абайдың “Толық адам” тұжырымдамасына негізделіп, үш бағыт – «Ыстық қайрат», «Нұрлы ақыл», «Жылы жүрек» идеяларын қамтыды. Студенттер өз өнерлерін паш етіп, би, ән және театрландырылған көріністер арқылы көрерменге рух пен шабыт сыйлады.

Филология институты, «Орыс тілі» білім беру бағдарламасының 1-курс студенті Карина Отенбаева кештен алған әсерін жасыра алмады:

«Бүгінгі шара ерекше әсер қалдырды. Бұл – университеттегі белсенділікке, жетістікке бастар алғашқы қадамым деп білемін. Символды қабылдау – үлкен жауапкершілік. Алдағы уақытта жан-жақты дамуға, университеттің өркендеуіне өз үлесімді қосуға тырысамын. Оқу орнына қадам басқан сәттен бастап, өзімді үлкен отбасын тапқандай сезіндім. Рухы биік QyzPU студенті болу – мен үшін үлкен мақтаныш!», – деді ол.

Шараға Жастар саясаты басқармасының басшылығы, Алматы қаласының комьюнити орталықтарының өкілдері, сондай-ақ Сағадат Нұрмағамбетов атындағы Құрлық әскерлерінің әскери институты, Радиоэлектроника және байланыс әскери-инженерлік институты, ҚР ұлттық қауіпсіздік комитеті мен Қазақстан Республикасы Ұлттық қауіпсіздік комитеті Шекара академиясының курсанттары қатысты.

Қазақ ұлттық қыздар педагогикалық университеті жаңа оқу жылында барлық студенттерге сәттілік, шабыт және жарқын жетістіктер тілейді

 

Қаржылық сауатқа арналған кезекті мастер класс

Қазақ ұлттық қыздар педагогикалық университетінде 1-курс студенттеріне арналған «Қаржылық сауаттылық негіздері» тақырыбындағы мастер класс жалғасуда. Іс-шараны Тұлға қалыптастыру департаменті, Қыздар көшбасшылығы және кәсіпкерлік орталығы ұйымдастырып отыр.

Спикер ретінде сертификатталған КОУЧ, «Sen» кітабының авторы Азамат Скаков шақырылып, студенттерге қаржылық сауаттылықтың негізгі қағидалары, уақытты тиімді басқару тәсілдері және мақсатқа жетудің нақты жолдары туралы тәжірибесімен бөліседі.

Шараның мақсаты – студенттердің қаржылық білімін арттыру арқылы олардың көшбасшылық қабілетін, кәсіби дамуын және өмірлік дағдыларын жетілдіру. Бұл бастама БҰҰ-ның Тұрақты даму мақсаттарының IV – «Сапалы білім», VIII – «Лайықты жұмыс пен экономикалық өсу» және V – «Гендерлік теңдік» бағыттарына сәйкес жүзеге асырылуда.

Өтетін күні: 6 қыркүйек 2025 жыл
Уақыты: 15:00–17:00
Өтетін орны: №1 оқу ғимараты, Акт залы

Студенттерді қатысуға шақырамыз!

Қазақ ұлттық қыздар педагогикалық университетінде Ұстаздар күні аталып өтті

2025 жылғы 2 қазан күні Қазақ ұлттық қыздар педагогикалық университетінде дәстүрлі Ұстаздар күніне арналған «Мың алғыс саған – Ұстазым» атты мерекелік шара өтті.

Мерекелік жиынның басты мақсаты – ұстаздардың қажырлы еңбегін құрметтеу, білім беру саласындағы олардың рөлін айшықтау және жас ұрпақ тәрбиесіндегі өлшеусіз маңыздылығын насихаттау болды.

Іс-шарада университеттің Басқарма төрағасы – Ректоры міндетін атқарушы Сәбит Суатай ұстаздарға жүрекжарды алғысын білдіріп, олардың еңбегінің қоғамдағы ерекше орнына тоқталды. Ол соңғы жылдары университет қол жеткізген жетістіктерді атап өтіп, бұл табыстардың артында ұстаздардың адал қызметі тұрғанын ерекше атап өтті.

Сондай-ақ Сәбит Құрманжанұлы  Қазақстан Республикасының Ғылым және жоғары білім министрлігінің Құрмет грамотасын, Қазақстан Республикасының Оқу-ағарту министрлігінің марапаттарын, сондай-ақ «Ана тілін дамытуға қосқан үлесі үшін» төсбелгісін ұстаздарға табыстады.

Мерекелік шара аясында Жастар саясаты орталығы ұйымдастырған концерттік бағдарлама ұсынылды. Студенттер мен қызметкерлер ұстаздарға арнап ән шырқады, би биледі, театрландырылған көріністер қойып, мерекелік көңіл-күй сыйлады.

«Мың алғыс саған – Ұстазым» атты іс-шара ұстаздар қауымына құрмет көрсетумен қатар, университет ұжымы мен студенттері арасындағы бірлік пен сыйластықтың айқын көрінісіне айналды. Бұл мереке білім беру саласын дамытуға және педагог мәртебесін арттыруға қосылған зор үлес ретінде ерекше маңызға ие болды.

 

Студенттер салауатты өмір салты туралы дәрігерлерден кеңес алды

2025 жылғы 2 қазанда Қазақ ұлттық қыздар педагогикалық университетінің №6 студенттер үйінде медицина қызметкерлері студент жастармен кездесу өткізді.

Шараға жалпы практика дәрігері Тасилова Гүлнұр Арзанбекқызы және медбике Майданбекова Мадина қатысып, студенттерге денсаулықты сақтау мен өмір салтын жақсартудың маңызды қырларын түсіндірді.

Кездесу барысында дұрыс тамақтанудың пайдасы, ұйқы мен күн тәртібінің маңызы, жеке тазалық ережелері, созылмалы аурулардың алдын алу тәсілдері және күзгі-қысқы маусымдағы жұқпалы дерттерден сақтану жолдары кеңінен сөз болды. Студенттер белсенділік танытып, өз сұрақтарына толыққанды жауап алды.

Бұл бастама БҰҰ-ның Тұрақты даму мақсаттарының бірі – ТДМ 3 «Денсаулық және амандық» бағытына сәйкес жүзеге асырылып, жастардың салауатты өмір салтын қалыптастыруына ықпал етуде.

Қарттарға құрмет – ұрпақтар сабақтастығының айнасы

Қазанның 1-і – Қарттар күніне орай Қазақ ұлттық қыздар педагогикалық университетінің студенттері мен қызметкерлері Алмалы ауданындағы жалғыз басты қарияларға арнайы азық-түлік себеттерін жеткізді.

Жастар қарттардың шаңырағына барып, мерекелік көңіл-күй сыйлап қана қоймай, тұрмыстық істеріне қолғабыс жасап, әңгімелесіп, жылы лебіздерін білдірді.

Университет ұжымы ұйымдастырған қайырымдылық акциясының басты мақсаты – ардагерлердің қоғамға сіңірген еңбегін бағалау, оларға қамқорлық көрсету және студенттердің бойына ізгілік пен мейірімділік құндылықтарын сіңіру.

Айта кетейік, Қыздар университеті бұл бастаманы алдағы уақытта тұрақты түрде жалғастыруды көздеп отыр.  Алдағы уақытта волонтер студенттер ай сайын жалғыз басты қарттардың жағдайын біліп, тұрмыстық көмек көрсетуді жүйелі түрде жалғастырады.

Жоба БҰҰ-ның Тұрақты даму мақсаттарының бірі – ТДМ 11 «Тұрақты қалалар мен елді мекендер» бағытына сәйкес жүзеге асырылуда.

Денсаулық – басты байлық: студенттер мен дәрігерлердің кездесуі

2025 жылғы 1 қазанда Қазақ ұлттық қыздар педагогикалық университетінің №1 студенттер үйінде медицина саласының мамандары студенттермен кездесті.

Шараға жалпы практика дәрігері Жаннұр Амангелдиева, сондай-ақ медбикелер Құралай Дүйсекеева мен Айман Алдибекова қатысып, жастарға денсаулықты сақтау жөнінде кеңестер берді. Мамандар дұрыс тамақтану, күн тәртібін сақтау, жеке гигиена, созылмалы аурулардың алдын алу және маусымдық инфекциялардан қорғану тәсілдері туралы ақпаратпен бөлісті.

Кездесу барысында студенттер өздерін толғандырған сұрақтарын қойып, кәсіби жауаптар алды. Мұндай шаралар жастардың медициналық сауаттылығын арттырып қана қоймай, олардың денсаулығына жауапкершілікпен қарауына ықпал етеді.

Бұл бастама БҰҰ-ның Тұрақты даму мақсаттарының бірі – ТДМ 3 "Денсаулық және амандық" бағытына сәйкес жүзеге асырылуда. Аталған бағыт әрбір адамның денсаулығын нығайтуға, салауатты өмір салтын қалыптастыруға және өмір сапасын арттыруға бағытталған.

QyzPU студенттері Республика күніне орай өткен футзал чемпионатының ашылуына қатысты

2025 жылғы 24 қыркүйекте Республика күніне орай Қазақстан Республикасы ҰҚК Академиясының спорт кешенінде арнаулы және арнайы әскери оқу орындары мен арнаулы мемлекеттік органдар қызметкерлері арасында футзалдан ашық чемпионаттың ашылу салтанаты өтті.

Аталған іс-шараға Қазақ ұлттық қыздар педагогикалық университетінің Жастар саясаты орталығының белсенді жастары да арнайы шақырылып, көрермендерге мерекелік көңіл-күй сыйлады. Ашылу рәсімінде студенттер ұлттық би билеп, өнерлерін ортаға салды.

Бүгінде елімізде спорттық жарыстардың, соның ішінде футболдың маңызы артып, тартысты түрде өтуде. Салауатты өмір салтын насихаттауға бағытталған мұндай бастамаларға QyzPU студенттері де белсенді түрде атсалысып келеді.

Осындай игі шаралар жастардың патриоттық рухын көтеріп қана қоймай, олардың белсенді азамат болып қалыптасуына жол ашады.

«Хореография» мамандығының студенттеріне арналған «Дұрыс тамақтанудың маңызы» тақырыбында кездесу өтті

2025 жылғы 26 қыркүйекте Қазақ ұлттық қыздар педагогикалық университетінде 6В02102 – «Хореография» мамандығының 1-курс студенттері үшін Хореография және арт-менеджмент кафедрасының ұйымдастыруымен танымдық кездесу өтті.

Іс-шараның арнайы қонағы – Менталды денсаулықты дамыту орталығының диетологы Алмагүл Ержекенова. Кездесу барысында ол дұрыс тамақтанудың студенттердің физикалық және психоэмоционалдық жағдайына, еңбек қабілеттілігі мен созылмалы шаршаудың алдын алудағы рөліне тоқталды.

Диетолог теңгерімді рацион қағидалары, дәрумендер мен микроэлементтердің маңызы, су балансын сақтау қажеттілігі туралы жан-жақты баяндап, хореограф-студенттердің жоғары физикалық жүктемелерін ескере отырып, фастфуд пен энергетикалық сусындардың зиянына ерекше назар аударды.

Кездесу ашық диалог форматында өтіп, студенттер пайдалы сұрақтар қойып, мәзірді дұрыс құрастыру мен денсаулықты ұзақ мерзімге сақтау үшін қажетті әдеттер жайлы құнды кеңестер алды.

Шара студенттердің кәсіби дамуы мен өмір сапасына тікелей әсер ететін дұрыс тамақтану мәдениетін қалыптастыруға серпін берді.